Жуырда ғана Данияр Қайсар жастар командасын капитан ретінде алаңға бастап шығатын. Freedom QJ League турнирінде екі маусымда 25 матч өткізіп, 3 гол соғып, 5 нәтижелі пас берді. 2024 жылы лиганың үздіктері қатарына еніп, жұлдыздар құрамында «Црвена Звезда» командасына қарсы матчқа шақырту алды. Сол кездесуде QJ League құрамасы сербиялық қарсыласын 2:0 есебімен жеңді. Алайда сол кездің өзінде бұл оқиғаның басқа қыры бар екені байқалған.
Футболдағы мансабымен қатар, Данияр киберкеңістікте де өзін сенімді сезінді. Екі жыл қатарынан Freedom Media Cyber Cup турниріне қатысып, жарыстың шешуші кезеңдеріне дейін жетті. Оның ойын мәнері, сабырлылығы мен тактикалық түсінігі Қарағандыдағы UEL мектебінің назарын аударып, дәл сол жерде оған келесі қадам — «кеншілер» сапына қосылу ұсынылды.
Бұл ауысым кездейсоқ емес еді. UEL командасымен «Шахтер» бұған дейін де түрлі әлеуметтік жобалар мен турнирлер аясында бірге жұмыс істеген. Солардың бірі — QJ League және QOFA ұйымдарымен бірлесіп, балалар үйлерінің тәрбиеленушілеріне арналған фестиваль-турнир. Сол сәтте футбол тағы да жай ойыннан әлдеқайда кең ұғым екенін дәлелдеді.
Бүгін Данияр үшін жаңа кезең басталды. Ол кәсіби футболдағы мансабын аяқтап, өз тәжірибесі мен шеберлігін киберфутболға бағыттап, eKPL аясында «Шахтер» сапына қосылды. Мұнда бәрі басқаша болғанымен, сезімдер сол қалпы: сол жауапкершілік, сол эмоция, сол жеңіске деген ұмтылыс.
— «Шахтер» сияқты клубтың намысын қорғау мен үшін үлкен мәртебе, — дейді Данияр. — Бұл менің өмірім мен мансабымдағы жаңа сынақ. Команданы лайықты таныстырып, жанкүйерлерді жақсы ойынмен қуантуға тырысамын.
Бастамасы жаман емес. eKPL-дегі алғашқы матчында Данияр «Атырау» командасын 3:1 есебімен жеңді. Сенімді. Салқынқанды. «Шахтер» стилінде.
Алда — одан да маңызды сынақ. Ертеңгі қарсылас — Қайрат. Матч 16:00-де басталады.
Бұл — тек бастамасы. Алға, «Шахтер»!
Шахтёр
Түркістан
