«Шахтёр» Ж жасөспірімдер командасы алғашқы оқу-жаттығу жиынын бастау үшін Шымкент қаласына жол тартты. Бұл — команда үшін маңызды дайындық кезеңі, себебі биылғы маусымаралық кезең үш бірдей жиыннан тұрады: осы қараша айындағы жиын, сондай-ақ желтоқсан мен қаңтарда өтетін жиындар.
Басты бағдарды бапкерлік штаб — QJ League-да өнер көрсеткен жас ойыншыларға артып отыр. Жаңа маусымға дайындық бағдарламасына функционалдық дайындық, тактикалық жаттығулар және футболшылардың жеке қабілеттерін дамыту кіреді. Команда үміткер ойыншылардың барлығына мүмкіндігінше көп ойын тәжірибесін беру үшін бірнеше бақылау матчтарын өткізуді жоспарлап отыр.
Бұған дейін клубтың жастар командалары жиындарды негізінен Қарағандыда — манежде және «Жастар» базасында өткізетін. Енді «Шахтёр» Ж сыртқы жиындар форматына көшуде. Бұл — клуб құрылымын дамыту және жас ойыншыларды дайындау сапасын арттыру бағытындағы маңызды қадам.
Бұл жолғы жиын — клубтың жаңа басшылығының жұмысты бастап, жүйелі өзгерістерді қолға алғанының алғашқы айқын мысалдарының бірі. Жастарға арналған мүмкіндіктерді кеңейту, дайындық жағдайын жақсарту және жаттығу процесіне қойылатын талаптарды күшейту — мұның барлығы Премьер-лигаға оралуды мақсат етіп отырған негізгі команда «Шахтёр» үшін мықты іргетас қалыптастыруға бағытталған.
Шахтёр
Түркістан
