Кездесу алдында дәстүрлі түрде жанкүйерлерге арналған фан-аймақ ұйымдастырылды. Мұнда диджей, аниматорлар мен алып қуыршақтар өнер көрсетіп, көрермендердің көңілін көтерді. Сонымен қатар тамақтану орындары, үстел ойындары аймағы, аквагрим, фотобудка және PS5 ойын аймағы жұмыс істеді. Көрермендер арасында смартфон, «Яндекс» ақылды колонкасы және PlayStation 5 сынды сыйлықтар ұтысқа тігілді.
«Шахтердің» негізгі құрамында алаңға шыққандар: Никита Килджиев, Рифат Нұрмұғамет (к), Даулет Зайнетдинов, Арман Нүсіп, Рафаиль Оспанов, Артем Литош, Владислав Прокопенко, Максим Галкин, Қасымжан Таипов, Александр Мигунов, Марк Богачев.
Матч басталар алдында футболшылар мен жанкүйерлер «Шахтер» клубының адал жанкүйері Қанат Қасымовты бір минут үнсіздікпен еске алды. Футбол клубы оның кенеттен қайтыс болғаны туралы хабарды ауыр қайғымен қабылдады. Қанат жай ғана жанкүйер емес, ол командамен бірге өмір сүріп, «кеншілерді» әрдайым қолдап, жеңістер мен жеңілістерді бірге бөліскен жан еді. Оның клубқа деген адалдығы мен сүйіспеншілігі мәңгі есте қалады.
Ойынның алғашқы минуттарынан бастап «Шахтер» бастаманы өз қолына алып, қарсылас қақпасына жиі қауіп төндірді. Әсіресе Артем Литош шабуылда белсенділік танытса, Максим Галкин қапталдан жиі өтіп, қауіпті сәттер ұйымдастырды. Алайда бірінші таймда есеп ашылған жоқ.
Екінші таймда «кеншілер» өз басымдығын нәтижеге айналдыра алды. 51-минутта Арман Нүсіп қақпашыны әдемі соққымен алдап өтіп, есеп ашты. 72-минутта Артем Литош жеке шеберлігін көрсетіп, сол қапталмен өтіп, есепті еселей түсті. Қосымша уақытта Аруп Саутов (90+4) матчтың қорытынды есебін белгіледі — 3:0.
Бұл жеңіс мереке күні қарағандылық жанкүйерлер үшін тамаша сыйлық болды және «Шахтердің» турнирлік кестедегі көшбасшылығын сақтап қалуына мүмкіндік берді.
Шахтёр
Экибастуз
